9. ఏలనో

కలల సరసన తూగవలసిన రేయిలో

నిదుర నా దరి చేరనన్నది ఏలనో ॥

మూగమనసున గొంతు విప్పే తలపులు

బ్రతుకు బాటన ఊహకందని మలుపులు

కలత రేపినవెవరివో ఈ పిలుపులు

నిశ్శబ్దంగా తట్టినవి ఎద తలుపులు

          కనులు కాయగ ఎదురుచూపులు చూసినా ॥నిదుర॥

చిగురుటాకులు సడులు సద్దే మణిగెనే

గాలి సైతం కొండ చాటున సోలెనే

మబ్బు మాటున చందురుడు మైమరచెనే

మౌనమే లోకాన రాజ్యాలేలెనే

          జోలపాడుతు తల్లులే తలవాల్చినా ॥నిదుర॥