40. నల్లనయ్యా నువ్వు లేక

వేగరారా నీకోసం వేచి ఉన్నది బృందావనం

నల్లనయ్యా నువ్వు లేక గోకులమంతా చినబోయే ॥

వెన్నతింటూ నువ్వు విరిచిన ఉట్టి కడవలు గుర్తున్నాయా

వాటి వలెనే మా మనసులు ముక్కలైపోయాయి కృష్ణా

ఎటు చూసినా నీ రూపమే ఏం చేసినా నీ ధ్యానమే

నిను వీడి ఉండలేక బ్రతుకే బరువాయే కాదా ॥

లేగదూడలు తల్లి ఆవుల పాలు తాగగ కదలవాయే

వాటి వీనులు వేణునాదం గ్రోలగ నీ దారి చూసే

నువ్వు లేవని ఆమని కూడా ఈ నేలను తాకరానంది

చెట్లు తీగలు ఆకులు పూలు విరహంతో వాడిపోయే ॥

నిను తలచీ వేచి వేచి కనులన్నీ కాయలు గాచి

వాటి నిండా నువ్వు పంపిన కలలే కల్లలైపోగా

ప్రాణమున్నా జీవం లేని రాతిబొమ్మై పడి న్నది

నీ ఉనికే అణువణువూ నింపుకున్న వెర్రి రాధ ॥