1. ఎదురుచూపు

వెన్నెలమ్మ విరిసే వేళ

చంద్రకాంతి కురిసేవేళ

చల్లగాలి తనువును తాకి,

తాపమింక పెంచేవేళ

          నీవు రావు ఎందుకో ప్రియా

          జ్ఞాపకాలు పంపుతావిలా ॥

చుక్కలన్ని నన్ను చూసి

చిలిపిగా నవ్వుతుంటే

చీకటింక చిక్కనయ్యి

అల్లరిగా చూస్తూ ఉంటే

          తాళలేను విరహవేదన

          ఓపలేను ఈ నిరీక్షణ ॥

రేయి సగం గడిచిపోయినా

చందమామ అలసిపోయినా

సవ్వడంత ఆగిపోయి

నిశ్శబ్దం అలుముకున్నా

          నిదురరాదు రాత్రివేళల

          కలలనైనా కానరావేలా ॥