3. ఎవరో

కొత్తగా కనుల లోకాలలో వచ్చి నిలిచారెవ్వరో

మెత్తగా మనసు తాళాలనే విప్పతలచారెవ్వరో ॥

నా హృదయవీథిలో రేగింది కలకలం

ఈ మధుర వేదనకు ఒక్కింత కలవరం

ఎన్నడూ తెరవని అంతర కవాటం

గడియ కదిపారెవ్వరో ॥

పరిచయం లేని ఈ నిట్టూర్పు సవ్వడి

పరవశం కలిగించు వింతైన అలజడి

గమ్యమే ఎరుగని బ్రతుకుయానంలో

బాట మలచారెవ్వరో ॥

ఎటువైపు చూసినా నిజమైయే కలలే

ఆనంద కడలిపై ఉప్పొంగు అలలే

అనురాగ రాగాన గుండె లోగిలిలోకి

తోడు పిలిచారెవ్వరో ॥