21. విన్నపం

ఓ చిన్ని కోయిల, రాగాల ఊయల

ఆమని రాగానే తెలియచేయవా

నీ తీయని గొంతుతో ఓ పాట పాడవా

ఆ మధుమాసం రాక సూచనీయవా ॥

మామిడి కొమ్మలే చిగురులు తొడిగితే

పూతలు చెప్పవా ఆ సంగతి

మల్లియ రెమ్మలే రెక్కలు విప్పితే

తావులు చెప్పవా ఆ సంగతి

ఓ మావి మామయా, ఓ మల్లె చేడియా

ఋతువుల రాజు రాక తెలియజేయరా ॥

పూవుల తేనె తాగి ఝుమ్మని ఆడుతూ

తుమ్మెద చెప్పదా ఆ సంగతి

పచ్చని కాంతుల కోకను చుట్టిన

ప్రకృతే చెప్పదా ఆ సంగతి

ఓ చిట్టి తుమ్మెదా, ఓ ప్రకృతి దేవతా

వసంతరాజు రాక తెలియచెప్పరా ॥