54. వీడుకోలు

పదిలంగ వెళ్ళిరా ఓ మల్లి కొమ్మా

నిన్నేలుకొనువాడు వేచినాడమ్మా

పుట్టింటిదీపమా పుత్తడి బొమ్మా

మెట్టింటికాంతివై విలసిల్లవమ్మా

అమ్మ దీవెనలంది శుభములను పొంది

సిరిలక్ష్మివై అచట అలరారవమ్మా ॥

అత్తగారే నీకు తల్లియై నిలచు

తండ్రి వలె నీ మామగారు భాసిల్లు

నీ ప్రేమతో వారి మదుల గెలువమ్మా

మహరాణివై వెలగవో ముద్దుగుమ్మా

మంచి నడవడికతో మసులుకో తల్లీ

కన్నవారికి మంచి పేరు తేవాలి

ఆ ఇంటి అనురాగ సంపదను పొంది

పుట్టింటి వారినే మరువబోకమ్మా ॥