8. మధురగీతిక

పాడవే కోయిల ఈ మధురగీతిక

మదిలోన వీచింది అనురాగ వీచిక ॥

తలపులకు వచ్చాయి రెక్కలే కొత్తగా

నింగినే తాకగా ఎగిరాయి ఎత్తుగా

ఆనందమైకాన ఊగాయి మత్తుగా

          దరికి రమ్మందిలే మేఘాల మాలిక

          విరుల తూగిందిలే స్నేహాల డోలిక ॥

తేనియలు కురియగా చుక్కలే మెత్తగా

చిగురాకు చిలిపిగా చెక్కిలే ఒత్తగా

పరువాల నేలపై వలపులే విత్తుగా

          చిగురు తొడిగిందిలే చిన్నారి కోరిక

          చెలరేగు ఆశలకు లేదు ఇక తీరిక ॥

పూత పూసిన మావి సిరిమల్లి కోసం

చిరుగాలతో పంపె మదనసందేశం

ఆమనిని తెచ్చేసెనెపుడో మధుమాసం

          జాబిలే తొలగించె చీకట్ల యవనిక

          సడి చేయనందిలే ఏకాంత వాటిక ॥

ఎద కడలిపై అలలు ఉవ్వెత్తు లేచాయి

కనులు దాటిన కలలు తీరాన వేచాయి

పెదవి మాటున కథలు పదిలంగ దాచాయి

          తీయని కలయికకు హరివిల్లు వేదిక

          వేగరా మాధవా వేచింది రాధిక ॥