60. విడిపోయే వేళలో

నిర్దయగా సాగిపోవు కాలానికి బానిసలం

ఈ సమయాన్నాపలేము మన కోసం కలకాలం

నిరంతరం సాగే ఈ జీవన పయనంలో

ఎన్నో మజిలీలు దాటి ఈ మజిలీ చేరామ

గమ్యంచేరాలంటే మజిలీ దరి ఆగలేము

ఎవరి దారి వెంట వారు సాగిపోక మానలేము

ఈ అనంత వాహినిలో దరి చేరే కొందరు

తీయని అనుబంధంతో పెనవేసుకుపోతారు

ఎంత పంచుకున్నా పెరిగే అనుబంధమిది

స్నేహితుల సామీప్యం తరగని ఆనందనిధి ॥

మనసు కోరుకుంటున్నది శాశ్వత సహవాసం

తనివి తీరకున్నా మరి తప్పదు విడిపోవటం

చిరునవ్వున మొదలయ్యే ఈ చిన్నారి స్నేహం

ఎప్పటికీ మనస్సులో తీరని ఓ దాహం ॥

స్నేహదీప్తి వెలిగించి విడిపోయే నేస్తమా

ఈ చదువుల ఆలయాన కలిసిన ఓ మిత్రమా

లక్ష్యం చేరే పథాన విజయం నీదవ్వాలి

అడ్డంకులు సైతం గమ్యానికి మెట్లవుతుంటే

ధ్యేయం నీ కృషితో మరి చేరువగా రావాలి ॥

శుభాకాంక్షలందుకోని విడిపోయే ఈ వేళ

ఓ కానుక అడుగుతాను ఇస్తావా మిత్రమా

మళ్ళీ ఎపుడైనా మనం తిరిగి ఎదురు పడితే

నీ పెదవిన చిరునవ్వును విరిపిస్తావు కదూ

పలకరించి కుశలమడిగి మురిపిస్తావు కదూ

ఈ జ్ఞాపకమే కానుకగా ఇస్తావా నేస్తం

మరపెరుగని స్నేహం నాకిస్తావా నేస్తం? ॥