10. చిట్టిపాప కమ్మగా నిదురేగెనే

చీకటికి చిరుగాలి చెప్పే కథలు వింటూ

చిట్టిపాప కమ్మగా నిదురేగెనే ॥

మబ్బు తునకల పరుపుమీద

జాబిలమ్మ జోల వింటూ

నింగి ఒడిలో చందమామ

వెచ్చగా ఒదిగాడు చూడు

చిగురుటాకూ, కదలకూ సడి చేయకు ॥

రేయి తెచ్చెను ఎచటి నుంచో

మిణుకుమంటూ చుక్కలెన్నో

గుండె మాటున దాచుకున్నవి

వెండి బంగరు కలల రాసులు

చిన్న కన్నుల చిరు కలను పండించవే ॥

ఆకసం ఆనందమీయగ

మల్లెపూవుల సిరులనీయగ

చుక్కలే చిరునగవులీయగ

చెక్కిలే విరసింది తీయగ

చల్లగాలి ప్రేమగా దీవించవే ॥