25. ఎదురుచూపు

నిదుర రాదు రేయి గడిచిపోతున్నా

ఎదురుచూసి నిరాశతో సొలసిపోవు చిన్నారికి ॥

వేళ్ళమధ్య కొంగు చివర చుడుతూ

కోపంగా బుంగమూతి పెడుతూ

గడియారం ముల్లు వంక రుసారుసాచూస్తూ

బురువెక్కే శ్వాసలతో నిట్టూర్చే అమ్మాయికి ॥

చిన్న సడికి ఉలికి ఉలికి పడుతూ

తల ఎత్తి తలుపువంక చూస్తూ

చిరుగాలికి కదులుతున్న చిగురాకును కసురుతూ

నిరీక్షణకు నీరసించి వాడిపోవు అమ్మడికి ॥

అతని తలపు కలత రేపుతుంటే

మనసున తను అల్లరి పెడుతుంటే

వెచ్చని ఊపిరి తనువును వేడెక్కిస్తుంటే

విరహతాపవేదనతో కరిగిపోవు అమ్మణ్ణికి ॥

వేసవి పగలట వెన్నెలరేయి

అగ్నిజ్వాలలట చల్లటిగాలి

మల్లె స్పర్శ గుండెల్లో ముల్లు గుచ్చుకుంటుంటే

గాజులు వడ్డాణాలుగ మారిపోయిన చినదానికి ॥