30. నీ దరి చేరాలని

చిగురాకును కదిలించిన చిరుగాలినడిగాను

ఆమని విరిపించిన సిరిమల్లినడిగాను

వెన్నెల కురిపించిన జాబిల్లినడిగాను

తెలియదు ఆచూకీ ఎవ్వరికీ

ఎట్లా చేరాలి నీ దరికి ॥

దోచుకుపోయింది నా నిదురను ఆ రేయి, ఎవరికి చెప్పాలి?

మల్లెల వానైనా కలగదుగా హాయి, ఎట్లా బ్రతకాలి?

ఎంత చల్ల నీరైనా తీర్చలేని దాహమిది

మంచి గంధమైనా చల్లార్చలేని తాపమిది

రవికిరణం కరిగించిన నీహారికనడిగాను

నింగి ఒడిన నిదురించిన ఆ తారకనడిగాను

నెల కోయిల వినిపించిన చిరుగీతిక నడిగాను ॥

పగలే చీకటిగా అనిపిస్తున్నది, ఏమిటి ఈ మాయ?

ఎప్పుడు నీ రూపే కనిపిస్తున్నది, రాదే నీకు దయ?

అలసిన కన్నుల్లో తీరని నిరీక్షణ

ఊపిరి సాగేందుకు నీవే ప్రేరణ

నెమలిని మురిపించిన మేఘమాలనడిగాను

సిరులను పండించిన పసిడినేలనడిగాను

తుమ్మెద కరుణించిన జాజిపూలనడిగాను ॥