20. చిన్నారి కోరిక

సరదాగా ఊహల రెక్కలతో ఆకాశం ఎగిరి అందుకోనా

విరజాజుల వన్నెల కౌగిట్లో నీహారికనై కరిగిపోనా

సుగంధాల చిరువీచికలా పరుగాడే ఈ కోరికలు

ఈ కలల పూలతోటలో చిరకాలం ఉండిపోనా ॥

వేకువనే తూర్పున పండే

ఎరుపు తెచ్చి నా బుగ్గలకే అద్దుకోనా

ఉదయాన్నే కాంతులు కురిసే

సూరీడిని నుదుటి బొట్టుగా దిద్దుకోనా

చిని ఆశల విరిడోలికలో, తేలియాడు నా తీరికలు

ఈ కాంక్షల ఊయలూగుతూ కలకాలం నిలిచిపోనా ॥

రేయితీగ కొమ్మల విరిసే

చుక్కలతో పూలజడలే అల్లుకోనా

నేల నింగి కలయిక పూసే

ఇంద్రధనుస్సు నా మకుటంగా కూర్చుకోనా

మురిపెంగా ఎద వేదికపై గళం విప్పు సిరిగీతికలు

ఈ రాగం అనురాగంలో లాలిమనై కలిసిపోనా ॥