37. ఇంతేనేమో జీవితం

ఎంత దూరమో తెలియని పయనం - గమ్యం ఎరుగని ఒంటరి యానం

ఎదురు చూపులకు అంకితం - ఇంతేనేమో జీవితం॥

వెలుగు కరిగి చీకటి ఔతుంది - రేయి తరిగి ఉదయం తెస్తుంది

చీకటి వెలుగుల ఈ దొంగాట - తుది మొదలెరుగని గమ్మతు పాట

ఎంతకు తెగనిది ఈ పోరాటం - ఆశ ఊపిరుల చిర చెలగాటం

          అర్థం కాదీ భాగోతం - ఇంతేనేమో జీవితం॥

ఏదో చేయాలని ఆరాటం - తీరని దిగులుకు తొలి సోపానం

నిరంతరం సాగే అన్వేషణ - చివర మిగిల్చే అనంత వేదన

కారణమెరుగని నిరీహ-వ్యథ ఇది - విముక్తి లేని బంధం కథ ఇది

          పిచ్చి గీతల కాగితం - ఇంతేనేమో జీవితం॥

రెక్కలు తెగినది ఆశా విహగం - రమ్మని పిలిచే విశాల గగనం

ఎగరాలని ఆకాంక్ష దహించే - ఎగరలేని ఖగమాక్రోశించే

విధి దావాగ్నికి ఉనికి ఆహుతి - జీవితేచ్ఛకే పేర్చిన ఓ చితి

          మేధస్సుకు ఊహాతీతం - ఇంతేనేమో జీవితం॥

కనిపించే దసలేదీ లేదట - ఉన్నది ఎపుడూ కనిపించనిదట

అంతుబట్టదీ నిగూఢ తత్త్వం - అర్థం కాదు విరించి కవిత్వం

వీడేనా ఈ విచిత్ర వ్యూహం - తీరేనా ఈ పిపాసి దాహం

                             అంతం లేని విరహగీతం - ఇంతేనేమో జీవితం॥