31. నిన్నే చేరగా రానా

మదిలో తలపును నేనై, ఎదలో వలపును నేనై

నిన్నే చేరగ రానా ఓ నేస్తమా

విరిసే పువ్వును నేనై, నీ చిరునవ్వును నేనై

నీలో నిండగ రానా ఓ మిత్రమా ॥

ఆమనివై నీవొస్తే కోయిల పాటనై పలుకనా

వేకువనై నీవొస్తే తొలిరవి కిరణాన్నై నే మెరియనా

ఆడే నెమలిని నేనై, నవ్వే కమలిని నేనై

పెదవిన పండగ రానా ఓ స్నేహమా ॥

చినుకై నీవొస్తే కమ్మని పరిమళమై నే కదలనా

నదివై నీవొస్తే వేచే కడలిని నేనై నిలవనా

ఆ చిరుగాలిని నేనై, ఈ సిరిమల్లియ నేనై

నీ హృది కవితై రానా ఓ ప్రియతమా ॥